ಕರ್ನಾಟಕ ಪಂಚಾಯತ್ ಚುನಾವಣೆ: ತಾಲ್ಲೂಕು & ಜಿಲ್ಲಾ ಪಂಚಾಯತಿ ಸದಸ್ಯ ಸ್ಥಾನಗಳ ಅಧಿಕೃತ ಮೀಸಲಾತಿ ಪಟ್ಟಿ ಪ್ರಕಟ – ಶಿವಮೊಗ್ಗ ಜಿಲ್ಲೆಯ ಕಂಪ್ಲೀಟ್ ರಿಪೋರ್ಟ್!

ಅನಿಸಿಕೆ ನ್ಯೂಸ್ : ಕರ್ನಾಟಕದಲ್ಲಿ ಕಳೆದ ಹಲವು ಸಮಯಗಳಿಂದ ಕುತೂಹಲ ಕೆರಳಿಸಿದ್ದ ಗ್ರಾಮ ಸ್ವರಾಜ್ಯದ ಪ್ರಮುಖ ಅಂಗಗಳಾದ ತಾಲ್ಲೂಕು ಪಂಚಾಯತಿ ಹಾಗೂ ಜಿಲ್ಲಾ ಪಂಚಾಯತಿ ಚುನಾವಣೆಗಳಿಗೆ ಇದೀಗ ಅಧಿಕೃತ ಅಡಿಪಾಯ ಬಿದ್ದಿದೆ. ಯಾವುದೇ ಸಾರ್ವತ್ರಿಕ ಚುನಾವಣೆಗಳನ್ನು ಘೋಷಣೆ ಮಾಡುವ ಮುನ್ನ ರಾಜ್ಯ ಸರ್ಕಾರವು ಪ್ರತಿ ಕ್ಷೇತ್ರಗಳ ಗಡಿ ಹಾಗೂ ಅಲ್ಲಿ ಸ್ಪರ್ಧಿಸುವ ಸಮುದಾಯಗಳ ವರ್ಗವಾರು ಮೀಸಲಾತಿಯನ್ನು (Reservation) ನಿಗದಿಪಡಿಸುವುದು ಕಡ್ಡಾಯ ನಿಯಮವಾಗಿದೆ. ಅದರಂತೆ ಕರ್ನಾಟಕ ಸರ್ಕಾರದ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆಯು ರಾಜ್ಯದ ಎಲ್ಲಾ ಜಿಲ್ಲಾ ಮತ್ತು ತಾಲ್ಲೂಕು ಪಂಚಾಯತಿಗಳ ನೂತನ ಸದಸ್ಯ ಸ್ಥಾನಗಳು ಹಾಗೂ ವರ್ಗವಾರು ಮೀಸಲಾತಿಯನ್ನು ಅಂತಿಮಗೊಳಿಸಿ ವಿಶೇಷ ರಾಜ್ಯಪತ್ರದಲ್ಲಿ (Gazette Notification) ಅಧಿಕೃತ ಅಧಿಸೂಚನೆ ಹೊರಡಿಸಿದೆ. ಈ ಮಹತ್ವದ ಆದೇಶದೊಂದಿಗೆ ರಾಜ್ಯದಲ್ಲಿ ಪಂಚಾಯತ್ ಚುನಾವಣಾ ಕಾವು ರಂಗೇರಿದ್ದು, ಗ್ರಾಮೀಣ ರಾಜಕೀಯ ಆಕಾಂಕ್ಷಿಗಳಲ್ಲಿ ಹೊಸ ಸಂಚಲನ ಮೂಡಿಸಿದೆ.

 ರಾಜ್ಯದ ಒಟ್ಟಾರೆ ಸದಸ್ಯ ಸ್ಥಾನಗಳ ವಿವರ :

ಕರ್ನಾಟಕ ರಾಜ್ಯಾದ್ಯಂತ ಒಟ್ಟು 1,129 ಜಿಲ್ಲಾ ಪಂಚಾಯತ್ ಸ್ಥಾನಗಳು (ಇದರಲ್ಲಿ 571 ಮಹಿಳೆಯರಿಗೆ ಮೀಸಲು) ಹಾಗೂ 3,656 ತಾಲ್ಲೂಕು ಪಂಚಾಯತ್ ಸ್ಥಾನಗಳು (ಇದರಲ್ಲಿ 1,905 ಮಹಿಳೆಯರಿಗೆ ಮೀಸಲು) ನಿಗದಿಯಾಗಿವೆ.

📌 ಶಿವಮೊಗ್ಗ ಜಿಲ್ಲಾ ಪಂಚಾಯತ್ ಸಂಪೂರ್ಣ ವಿವರ:

ಶಿವಮೊಗ್ಗ ಜಿಲ್ಲೆಗೆ ಒಟ್ಟು 39 ಜಿಲ್ಲಾ ಪಂಚಾಯತ್ ಸ್ಥಾನಗಳನ್ನು ನಿಗದಿಪಡಿಸಲಾಗಿದ್ದು, ಇದರಲ್ಲಿ 20 ಸ್ಥಾನಗಳು ಮಹಿಳೆಯರಿಗೆ ಮೀಸಲಾಗಿವೆ.

• ಒಟ್ಟು ಸ್ಥಾನಗಳು: 39 (ಮಹಿಳೆಯರಿಗೆ: 20)
• ಪರಿಶಿಷ್ಟ ಜಾತಿ (SC): 8 (ಮಹಿಳೆಯರಿಗೆ: 4)
• ಪರಿಶಿಷ್ಟ ಪಂಗಡ (ST): 2 (ಮಹಿಳೆಯರಿಗೆ: 1)
• ಹಿಂದುಳಿದ ವರ್ಗ 'ಅ' (BC-A): 7 (ಮಹಿಳೆಯರಿಗೆ: 4)
• ಹಿಂದುಳಿದ ವರ್ಗ 'ಬ' (BC-B): 2 (ಮಹಿಳೆಯರಿಗೆ: 1)
• ಸಾಮಾನ್ಯ ವರ್ಗ (General): 20 (ಮಹಿಳೆಯರಿಗೆ: 10)

.

ಶಿವಮೊಗ್ಗ ಜಿಲ್ಲೆಯ ತಾಲ್ಲೂಕುವಾರು ತಾಲ್ಲೂಕು ಪಂಚಾಯತ್ ವಿವರ:

ಶಿವಮೊಗ್ಗ ಜಿಲ್ಲೆಯ ಒಟ್ಟು 7 ತಾಲ್ಲೂಕುಗಳಲ್ಲಿ 113 ತಾಲ್ಲೂಕು ಪಂಚಾಯತ್ ಸದಸ್ಯ ಸ್ಥಾನಗಳಿದ್ದು, ಇದರಲ್ಲಿ 59 ಸ್ಥಾನಗಳು ಮಹಿಳೆಯರಿಗೆ ಮೀಸಲಾಗಿವೆ.

ತಾಲ್ಲೂಕು	ಒಟ್ಟು ಸ್ಥಾನ (ಮಹಿಳೆ)	SC (ಮಹಿಳೆ)	ST (ಮಹಿಳೆ)	ಹಿಂ.ವರ್ಗ 'ಅ' (ಮಹಿಳೆ)	ಹಿಂ.ವರ್ಗ 'ಬ' (ಮಹಿಳೆ)	ಸಾಮಾನ್ಯ (ಮಹಿಳೆ)
ಹೊಸನಗರ	12 (6)	1 (1)	1 (1)	3 (2)	1 (0)	6 (2)
ತೀರ್ಥಹಳ್ಳಿ	13 (7)	1 (1)	1 (1)	3 (2)	1 (0)	7 (3)
ಸಾಗರ	15 (8)	1 (1)	1 (1)	4 (2)	1 (1)	8 (3)
ಸೊರಬ	17 (9)	3 (2)	1 (1)	3 (2)	1 (0)	9 (4)
ಭದ್ರಾವತಿ	18 (9)	5 (3)	1 (1)	2 (1)	1 (1)	9 (3)
ಶಿಕಾರಿಪುರ	19 (10)	6 (3)	1 (1)	2 (1)	0 (0)	10 (5)
ಶಿವಮೊಗ್ಗ	19 (10)	5 (3)	1 (1)	2 (1)	1 (1)	10 (4)
ಜಿಲ್ಲೆಯ ಒಟ್ಟು	113 (59)	22 (14)	7 (7)	19 (11)	6 (3)	59 (24)

*ಗಮನಿಸಿ: ಆವರಣದಲ್ಲಿರುವ ( ) ಸಂಖ್ಯೆಗಳು ಮಹಿಳೆಯರಿಗೆ ಮೀಸಲಾಗಿರುವ ಸ್ಥಾನಗಳನ್ನು ಸೂಚಿಸುತ್ತವೆ.

ಗ್ರಾಮ ಭಾರತದ ಅಭಿವೃದ್ಧಿಗೆ ನಿಮ್ಮ ಮತವೇ ಅಡಿಪಾಯ – ನಿಮ್ಮ ಅನಿಸಿಕೆ ತಿಳಿಸಿ!

"ಸ್ಥಳೀಯ ಸಂಸ್ಥೆಗಳ ಚುನಾವಣೆ ಎಂದರೆ ಕೇವಲ ರಾಜಕೀಯ ಅಧಿಕಾರದ ಪ್ರಶ್ನೆಯಲ್ಲ, ನಮ್ಮ ಹಳ್ಳಿ-ತಾಲ್ಲೂಕುಗಳ ರಸ್ತೆ, ಕುಡಿಯುವ ನೀರು, ಅರೋಗ್ಯ , ಶಿಕ್ಷಣ ಮತ್ತು ಸಮಗ್ರ ಅಭಿವೃದ್ಧಿಯ ಮೂಲ ಶಕ್ತಿಯಾಗಿದೆ. ನಿಮ್ಮ ಕ್ಷೇತ್ರದ ಮೀಸಲಾತಿ ಬಗ್ಗೆ ಮತ್ತು ನಿಮ್ಮೂರಿನ ಮುಂದಿನ ನಾಯಕತ್ವ ಹೇಗಿರಬೇಕು ಎಂಬ ಬಗ್ಗೆ ನಿಮ್ಮ ಮುಕ್ತ ಅನಿಸಿಕೆಯನ್ನು ಕೆಳಗಿನ ಕಾಮೆಂಟ್ ಬಾಕ್ಸ್‌ನಲ್ಲಿ ನಮ್ಮೊಂದಿಗೆ ಹಂಚಿಕೊಳ್ಳಿ."

– ಅನಿಸಿಕೆ ನ್ಯೂಸ್ (Anisike News)