ಹೊಸನಗರ-ರಿಪ್ಪನ್‌ಪೇಟೆ ಸಾರಿಗೆ ಅಭಿವೃದ್ಧಿಗೆ ಡಿಪೋ ಯೋಜನೆ ಸ್ವಾಗತಾರ್ಹ; ಆದರೆ ರಾತ್ರಿ ವೇಳೆ ಊರು ತಲುಪಲು ಬಸ್ ಇಲ್ಲದೆ ಜನಸಾಮಾನ್ಯರ ಪರದಾಟಕ್ಕೆ ಪರಿಹಾರ ಯಾವಾಗ?

ರಿಪ್ಪನ್‌ಪೇಟೆ / ಹೊಸನಗರ (ಅನಿಸಿಕೆ ನ್ಯೂಸ್):

ಮಲೆನಾಡಿನ ಪ್ರಮುಖ ಕೊಂಡಿಯಾಗಿರುವ ಹೊಸನಗರ ತಾಲೂಕಿನಲ್ಲಿ ಸಾರಿಗೆ ಮೂಲಸೌಕರ್ಯ ಬಲಪಡಿಸಲು ಕೆಎಸ್‌ಆರ್‌ಟಿಸಿ (KSRTC) ಬಸ್ ಡಿಪೋ ಹಾಗೂ ಸುಸಜ್ಜಿತ ಬಸ್ ನಿಲ್ದಾಣ ನಿರ್ಮಾಣಕ್ಕೆ ಜಾಗ ಗುರುತಿಸುವ ಪ್ರಕ್ರಿಯೆಗಳು ನಡೆಯುತ್ತಿರುವುದು ತಾಲೂಕಿನ ದೀರ್ಘಕಾಲೀನ ಬೆಳವಣಿಗೆಯ ದೃಷ್ಟಿಯಿಂದ ಆಶಾದಾಯಕ ಹೆಜ್ಜೆಯಾಗಿದೆ. ಆದರೆ, ಭವಿಷ್ಯದ ಯೋಜನೆಗಳು ಒಂದು ಕಡೆಯಾದರೆ, ಪ್ರಸ್ತುತ ದಿನನಿತ್ಯ ಉದ್ಯೋಗ, ವ್ಯಾಪಾರ, ಆಸ್ಪತ್ರೆ ಹಾಗೂ ಶಿಕ್ಷಣಕ್ಕಾಗಿ ಪಟ್ಟಣಗಳಿಗೆ ಹೋಗಿ ರಾತ್ರಿ ವೇಳೆ ಮರಳಿ ತಮ್ಮ ಗ್ರಾಮಗಳಿಗೆ ತಲುಪಲು ಬಸ್ ಸಂಪರ್ಕವಿಲ್ಲದೆ ನಿತ್ಯ ನರಕಯಾತನೆ ಅನುಭವಿಸುತ್ತಿರುವ ಜನಸಾಮಾನ್ಯರ ತುರ್ತು ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವುದು ಮೊದಲ ಆದ್ಯತೆಯಾಗಬೇಕಿದೆ.

ರಾತ್ರಿ ವೇಳೆ ಸ್ಥಗಿತಗೊಳ್ಳುವ ಸಾರಿಗೆ – ಗ್ರಾಮೀಣ ಜನರ ಅಸಹಾಯಕತೆ:

ಶಿವಮೊಗ್ಗ, ಸಾಗರ ಮತ್ತು ತೀರ್ಥಹಳ್ಳಿ ನಗರಗಳಿಗೆ ನಿತ್ಯ ನೂರಾರು ಬಡವರು, ಕೂಲಿ ಕಾರ್ಮಿಕರು, ವಿದ್ಯಾರ್ಥಿಗಳು ಹಾಗೂ ಮಧ್ಯಮ ವರ್ಗದ ವ್ಯಾಪಾರಿಗಳು ವಿವಿಧ ಕೆಲಸಗಳಿಗಾಗಿ ಪ್ರಯಾಣಿಸುತ್ತಾರೆ. ಸ್ವಂತ ವಾಹನ, ಬೈಕ್ ಅಥವಾ ಕಾರುಗಳಿರುವವರು ಯಾವುದೇ ಸಮಯದಲ್ಲಿ ಮನೆ ತಲುಪಬಹುದು. ಆದರೆ ಕೇವಲ ಸಾರ್ವಜನಿಕ ಸಾರಿಗೆಯನ್ನೇ ನೆಚ್ಚಿಕೊಂಡಿರುವ ಬಡ ಕುಟುಂಬಗಳು ಹಾಗೂ ಮಹಿಳೆಯರು ಸಂಜೆಯಾಗುತ್ತಿದ್ದಂತೆ ಬಸ್ ಸಿಗದೆ ಗಂಟೆಗಟ್ಟಲೆ ಪರದಾಡುವಂತಾಗಿದೆ:

ಸಾಗರ – ರಿಪ್ಪನ್‌ಪೇಟೆ ಮಾರ್ಗ: ರಾತ್ರಿ 7:00 ಗಂಟೆಯ ನಂತರ ರಿಪ್ಪನ್‌ಪೇಟೆ ಭಾಗಕ್ಕೆ ಸರಿಯಾದ ಬಸ್ ಸಂಪರ್ಕ ಸಿಗುತ್ತಿಲ್ಲ.

ತೀರ್ಥಹಳ್ಳಿ – ರಿಪ್ಪನ್‌ಪೇಟೆ ಮಾರ್ಗ: ರಾತ್ರಿ 7:30 ರ ಬಳಿಕ ಗ್ರಾಮೀಣ ಭಾಗಗಳಿಗೆ ತೆರಳುವ ವಾಹನಗಳ ಕೊರತೆ ಎದುರಾಗುತ್ತಿದೆ.

ಶಿವಮೊಗ್ಗ – ರಿಪ್ಪನ್‌ಪೇಟೆ ಮಾರ್ಗ: ಜಿಲ್ಲಾ ಕೇಂದ್ರವಾದ ಶಿವಮೊಗ್ಗದಿಂದ ರಾತ್ರಿ 9:30 ರ ನಂತರ ರಿಪ್ಪನ್‌ಪೇಟೆ ಹಾಗೂ ಹೊಸನಗರ ಮಾರ್ಗಕ್ಕೆ ಬಸ್ ಸೇವೆ ಲಭ್ಯವಿಲ್ಲದೆ, ರಾತ್ರಿ ಪಾಳಿಯ ನೌಕರರು, ಆಸ್ಪತ್ರೆಗೆ ಹೋಗಿ ಬರುವ ರೋಗಿಗಳು ಬಸ್ ನಿಲ್ದಾಣದಲ್ಲೇ ಕಾಲ ಕಳೆಯುವ ದುಃಸ್ಥಿತಿ ಇದೆ.

ಡಿಪೋ ನಿರ್ಮಾಣದ ಜೊತೆಗೆ ತುರ್ತು ಬಸ್ ಸಂಚಾರ ಆರಂಭವಾಗಲಿ:

ತಾಲೂಕಿನಲ್ಲಿ ನೂತನ ಡಿಪೋ ಹಾಗೂ ಬಸ್ ನಿಲ್ದಾಣ ನಿರ್ಮಾಣವಾಗುವುದು ಸಾರಿಗೆ ವ್ಯವಸ್ಥೆಗೆ ಶಕ್ತಿ ತುಂಬುತ್ತದೆ ಎಂಬುದು ನಿಜ. ಕಳೂರು ಹಾಗೂ ಗೋರಗೋಡು ಭಾಗಗಳಲ್ಲಿ ಡಿಪೋಗಾಗಿ ಜಾಗ ಪರಿಶೀಲನೆ ನಡೆಯುತ್ತಿರುವುದು ಉತ್ತಮ ಬೆಳವಣಿಗೆ. ಆದರೆ ಡಿಪೋ ಕಾಮಗಾರಿ ಪೂರ್ಣಗೊಂಡು ವಾಹನಗಳು ರಸ್ತೆಗೆ ಇಳಿಯಲು ಸಮಯ ಬೇಕಾಗುತ್ತದೆ. ಅಲ್ಲಿಯವರೆಗೆ ಗ್ರಾಮೀಣ ಜನರನ್ನು ಸಂಚಾರ ಸಂಕಷ್ಟದಲ್ಲಿ ಇಡುವುದು ಎಷ್ಟು ಸರಿ. ಇದಕ್ಕೆ ಶಾಶ್ವತ ಪರಿಹಾರ ಕಲ್ಪಿಸಿ ಎಂಬುದು ತಾಲೂಕಿನ ಪ್ರಜ್ಞಾವಂತರ ಪ್ರಶ್ನೆ.

ಖಾಸಗಿ ಹಾಗೂ ಸರ್ಕಾರಿ ಸಾರಿಗೆಯ ಸಮನ್ವಯ: ಮಲೆನಾಡಿನ ಗುಡ್ಡಗಾಡು ಪ್ರದೇಶಗಳಲ್ಲಿ ಮನೆಗಳು ರಸ್ತೆಯಿಂದ ದೂರವಿರುವುದರಿಂದ, ದಶಕಗಳಿಂದ ಸೇವೆ ಸಲ್ಲಿಸುತ್ತಿರುವ ಖಾಸಗಿ ಬಸ್‌ಗಳು ಎಂದಿನಂತೆ ಇನ್ನಷ್ಟು ಪ್ರೋತ್ಸಾಹ ದೊರಕಬೇಕು ಹಾಗೂ ಸರ್ಕಾರಿ ಬಸ್‌ಗಳು ಸಾರ್ವಜನಿಕರಿಗೆ ಪೂರಕವಾಗಿ ಕಾರ್ಯನಿರ್ವಹಿಸಬೇಕು.

ರಾತ್ರಿ ಪಾಳಿಯ ತುರ್ತು ಬಸ್ ಓಡಾಟ: ಶಿವಮೊಗ್ಗ, ಸಾಗರ ಹಾಗೂ ತೀರ್ಥಹಳ್ಳಿಯಿಂದ ರಾತ್ರಿ 8:30 ರಿಂದ 10:00 ಗಂಟೆಯ ಅವಧಿಯಲ್ಲಿ ರಿಪ್ಪನ್‌ಪೇಟೆ ಹಾಗೂ ಹೊಸನಗರ ಮಾರ್ಗವಾಗಿ ಕನಿಷ್ಠ ಎರಡು ಹೆಚ್ಚುವರಿ ಬಸ್‌ಗಳನ್ನು ತಕ್ಷಣವೇ ಆರಂಭಿಸಬೇಕಿದೆ.

ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳ ಗಮನಕ್ಕೆ ಸಾರ್ವಜನಿಕರ ಆಗ್ರಹ:

ಯಾವುದೇ ರಾಜಕೀಯ ಪಕ್ಷಪಾತವಿಲ್ಲದೆ, ಕೇವಲ ಸಾರ್ವಜನಿಕರ ಹಿತದೃಷ್ಟಿಯಿಂದ ಸಾರಿಗೆ ಇಲಾಖೆಯ ಉನ್ನತ ಅಧಿಕಾರಿಗಳು ಹಾಗೂ ಸ್ಥಳೀಯ ಜನಪ್ರತಿನಿಧಿಗಳು ಈ ವಾಸ್ತವ ಸ್ಥಿತಿಯನ್ನು ಗಂಭೀರವಾಗಿ ಪರಿಗಣಿಸಬೇಕು. ನೂತನ ಡಿಪೋ ನಿರ್ಮಾಣದ ಕನಸು ನನಸಾಗುವ ಜೊತೆಯಲ್ಲೇ, ರಾತ್ರಿ ವೇಳೆ ಗ್ರಾಮೀಣ ಭಾಗದ ಬಡ ಜನರಿಗೆ ಅನುಕೂಲವಾಗುವಂತೆ ಸಮರ್ಪಕ ಶಾಶ್ವತ ಬಸ್ ಸೇವೆಗಳನ್ನು ಕಲ್ಪಿಸಿಕೊಡಬೇಕೆಂದು ರಿಪ್ಪನ್‌ಪೇಟೆ ಹಾಗೂ ಹೊಸನಗರ ತಾಲೂಕಿನ ಸಮಸ್ತ ಸಾರ್ವಜನಿಕರು ಒತ್ತಾಯಿಸಿದ್ದಾರೆ.

📢 ಕ್ಷಣಕ್ಷಣದ ತಾಜಾ ಸುದ್ದಿಗಳಿಗಾಗಿ ನಮ್ಮ ಸೋಶಿಯಲ್ ಮೀಡಿಯಾ ಫಾಲೋ ಮಾಡಿ:

🟢 ವಾಟ್ಸಾಪ್ ಗ್ರೂಪ್ ಜಾಯಿನ್ ಆಗಿ 📸 ಇನ್‌ಸ್ಟಾಗ್ರಾಮ್ (@anisikenews) ಫಾಲೋ ಮಾಡಿ

ನಿಖರ ಮತ್ತು ವಿಶ್ವಾಸಾರ್ಹ ಸ್ಥಳೀಯ ಸುದ್ದಿಗಳಿಗಾಗಿ — ಅನಿಸಿಕೆ ನ್ಯೂಸ್ (Anisike News)