ಸಕ್ರೆಬೈಲು ಬಿಡಾರದಲ್ಲಿ ದುರಂತ ಅಂತ್ಯ: ಮಲೆನಾಡಿನಲ್ಲಿ ನಡುಕ ಹುಟ್ಟಿಸಿದ್ದ 'ಶೌರ್ಯ' ಆನೆ ಚಿಕಿತ್ಸೆ ಫಲಿಸದೆ ಸಾವು! ಕಾರ್ಯಾಚರಣೆ ವೇಳೆ ಉಂಟಾಗಿದ್ದ ಆಳವಾದ ಗಾಯವೇ ಮುಳುವಾಯಿತೇ?

ಅನಿಸಿಕೆ ನ್ಯೂಸ್ (ಶಿವಮೊಗ್ಗ):

ಚಿಕ್ಕಮಗಳೂರು ಜಿಲ್ಲೆಯ ಮಲೆನಾಡು ಭಾಗದಲ್ಲಿ ಸರಣಿ ದಾಳಿ ನಡೆಸಿ ಅಪಾರ ಭೀತಿ ಸೃಷ್ಟಿಸಿದ್ದ, ಇಬ್ಬರು ಕಾರ್ಮಿಕರ ಪ್ರಾಣ ಬಲಿಪಡೆದಿದ್ದ ಕಾಡಾನೆ ‘ಶೌರ್ಯ’, ಶಿವಮೊಗ್ಗ ಜಿಲ್ಲೆಯ ಪ್ರಸಿದ್ಧ ಸಕ್ರೆಬೈಲು ಆನೆ ಶಿಬಿರದಲ್ಲಿ ಅಸುನೀಗಿದೆ. ಸೆರೆಹಿಡಿದ ಸಂದರ್ಭದಲ್ಲಿ ಮೈಮೇಲಾಗಿದ್ದ ಆಳವಾದ ಗಾಯಗಳಿಗೆ ಸ್ಪಂದಿಸದೆ ಈ ಆನೆ ಸಾವನ್ನಪ್ಪಿದೆ ಎಂದು ತಿಳಿದುಬಂದಿದೆ.

ಕಾರ್ಮಿಕರ ಬಲಿ ಪಡೆದಿದ್ದ ಕರಾಳ ಹಿನ್ನೆಲೆ:

2026ರ ಫೆಬ್ರವರಿ ತಿಂಗಳಲ್ಲಿ ಚಿಕ್ಕಮಗಳೂರಿನ ಬಾಳೆಹೊನ್ನೂರು ಸಮೀಪದ ಹ್ಯಾರಂಬಿಪುರ ಕಾಫಿ ತೋಟದಲ್ಲಿ ಈ ಕಾಡಾನೆ ಅಟ್ಟಹಾಸ ಮೆರೆದಿತ್ತು. ಕೆಲಸಕ್ಕೆ ಬಂದಿದ್ದ ಹಾವೇರಿ ಮೂಲದ ಯಲ್ಲಪ್ಪ ಹಾಗೂ ಕೆಲವೇ ದಿನಗಳ ಅಂತರದಲ್ಲಿ ಹೊಸಪೇಟೆಯ ಬೋರಮ್ಮ (34) ಎಂಬ ಕಾರ್ಮಿಕ ಮಹಿಳೆಯನ್ನು ಬಲಿಪಡೆದಿತ್ತು. ಸತತ ಜೀವಹಾನಿಯಿಂದಾಗಿ ಆ ಭಾಗದ ಕಾಫಿ ತೋಟದ ಕಾರ್ಮಿಕರು ಹಾಗೂ ಸ್ಥಳೀಯರು ತೋಟಗಳಿಗೆ ತೆರಳಲು ಬೆಚ್ಚಿಬಿದ್ದಿದ್ದರು.

ಸಾರ್ವಜನಿಕರ ತೀವ್ರ ಆಕ್ರೋಶಕ್ಕೆ ಮಣಿದ ಅರಣ್ಯ ಇಲಾಖೆ, 7 ತರಬೇತಿ ಪಡೆದ ಸಾಕಾನೆಗಳು ಮತ್ತು ಸುಮಾರು 75 ಕ್ಕೂ ಅಧಿಕ ಸಿಬ್ಬಂದಿಗಳ ಬೃಹತ್ ತಂಡದೊಂದಿಗೆ ಬೃಹತ್ ಕಾರ್ಯಾಚರಣೆ ನಡೆಸಿ ಕೊನೆಗೂ ಈ ಒಂಟಿ ಸಲಗವನ್ನು ಸುರಕ್ಷಿತವಾಗಿ ಸೆರೆಹಿಡಿದಿತ್ತು.

ಸಕ್ರೆಬೈಲಿನಲ್ಲಿ 'ಶೌರ್ಯ' ಎಂದು ನಾಮಕರಣ:

ಸೆರೆಹಿಡಿದ ಬಳಿಕ ಆನೆಯನ್ನು ಶಿವಮೊಗ್ಗ ತಾಲೂಕಿನ ಪ್ರಸಿದ್ಧ ಸಕ್ರೆಬೈಲು ಆನೆ ಬಿಡಾರಕ್ಕೆ ತರಲಾಯಿತು. ಅಲ್ಲಿ ಅದಕ್ಕೆ ‘ಶೌರ್ಯ’ ಎಂದು ನಾಮಕರಣ ಮಾಡಿ, ಮರದ ಕ್ರೇಲ್‌ನಲ್ಲಿ ಇರಿಸಿ ಪಳಗಿಸುವ ತರಬೇತಿ ನೀಡಲಾಗುತ್ತಿತ್ತು. ಕಳೆದ ಕೆಲವು ತಿಂಗಳುಗಳಿಂದ ಮಾವುತರು ಮತ್ತು ಕಾವಾಡಿಗರು ಅದರ ಲಾಲನೆ-ಪಾಲನೆ ಮಾಡುತ್ತಿದ್ದರು

ಸಾವಿಗೆ ಕಾರಣವಾದ ಹಳೆಯ ಗಾಯಗಳು:

ಆನೆಯನ್ನು ಸೆರೆಹಿಡಿಯುವ ಭಾರಿ ಕಾರ್ಯಾಚರಣೆಯ ವೇಳೆಯಲ್ಲಿ ಅದರ ತೊಡೆಯ ಒಳಭಾಗ ಹಾಗೂ ಕಾಲಿನ ಭಾಗಗಳಿಗೆ ಗಂಭೀರ ಸ್ವರೂಪದ ಪೆಟ್ಟು ಬಿದ್ದಿತ್ತು. ಮೇಲ್ನೋಟಕ್ಕೆ ಕಾಣಿಸದ ಈ ಆಂತರಿಕ ಗಾಯಗಳು ದಿನ ಕಳೆದಂತೆ ಕೀವು ತುಂಬಿ ಉಲ್ಬಣಗೊಂಡಿದ್ದವು.

ಸೆಪ್ಟೆಂಬರ್ 30ರ ಸಂಜೆ ವೇಳೆಗೆ ತೀವ್ರ ನೋವಿನಿಂದ ಅಸ್ವಸ್ಥಗೊಂಡ ಆನೆ ಇದ್ದಕ್ಕಿದ್ದಂತೆ ಕ್ರೇಲ್‌ನಲ್ಲಿ ಕುಸಿದುಬಿದ್ದಿತ್ತು. ಅರಣ್ಯ ಇಲಾಖೆಯ ಪಶುವೈದ್ಯರ ತಂಡ ಸ್ಥಳಕ್ಕಾಗಮಿಸಿ ಸತತ ತುರ್ತು ಚಿಕಿತ್ಸೆ ನೀಡಿತಾದರೂ, ದೇಹದ ಆಂತರಿಕ ಸೋಂಕು ಹೆಚ್ಚಾಗಿದ್ದ ಕಾರಣ ಚಿಕಿತ್ಸೆ ಫಲಕಾರಿಯಾಗದೆ ಅಕ್ಟೋಬರ್ 01ರ ಬೆಳಿಗ್ಗೆ ಶೌರ್ಯ ಕೊನೆಯುಸಿರೆಳೆದಿದೆ.

ಆನೆಯ ಆರೈಕೆಯಲ್ಲಿ ನಿಷ್ಕಾಳಜಿ ವಹಿಸಲಾಗಿದೆ ಎಂಬ ಮಾತುಗಳು ಪರಿಸರ ವಲಯದಲ್ಲಿ ಕೇಳಿಬರುತ್ತಿದ್ದು, ಆನೆಯ ಸಾವಿಗೆ ನಿಖರ ಕಾರಣವೇನು ಎಂಬುದನ್ನು ಪತ್ತೆಹಚ್ಚಲು ಮರಣೋತ್ತರ ಪರೀಕ್ಷೆ ನಡೆಸಲಾಗುತ್ತಿದೆ. ಇಲಾಖೆಯ ಅಧಿಕೃತ ವರದಿ ಬಂದ ನಂತರವೇ ಸಾವಿನ ಅಸಲಿ ಕಾರಣ ಸ್ಪಷ್ಟವಾಗಬೇಕಿದೆ. ಬಿಡಾರದ ನಿಯಮಾವಳಿಗಳ ಪ್ರಕಾರ ಅಂತಿಮ ಸಂಸ್ಕಾರ ನೆರವೇರಿಸಲಾಗಿದೆ.

ಅನಿಸಿಕೆ ನ್ಯೂಸ್ :

ಮಾನವ ಮತ್ತು ವನ್ಯಜೀವಿ ಸಂಘರ್ಷಕ್ಕೆ ಕೊನೆ ಎಂದು? ಕಾಫಿ ತೋಟದಲ್ಲಿ ಹೊಟ್ಟೆಪಾಡಿಗಾಗಿ ದುಡಿಯುತ್ತಿದ್ದ ಇಬ್ಬರು ಅಮಾಯಕ ಕಾರ್ಮಿಕರು ಪ್ರಾಣ ಕಳೆದುಕೊಂಡಿದ್ದು ಎಷ್ಟು ನೋವಿನ ಸಂಗತಿಯೋ, ಅತ್ತ ಅರಣ್ಯ ಇಲಾಖೆಯ ಬೃಹತ್ ಕಾರ್ಯಾಚರಣೆಯ ಸೆರೆಯ ನೋವು ಹಾಗೂ ಗಾಯದ ಬಾಧೆ ತಾಳಲಾರದೆ ಮೂಕಪ್ರಾಣಿ ‘ಶೌರ್ಯ’ ಕೊನೆಯುಸಿರೆಳೆದದ್ದು ಅಷ್ಟೇ ದುರದೃಷ್ಟಕರ. ಕಾಡು ಕಿರಿದಾಗಿ ನಾಡು ಹಿರಿದಾಗುತ್ತಿರುವ ಇಂದಿನ ದಿನಗಳಲ್ಲಿ ಇಂತಹ ಸಂಘರ್ಷಗಳಿಗೆ ಶಾಶ್ವತ ಪರಿಹಾರ ಹುಡುಕುವ ತುರ್ತು ಅಗತ್ಯವಿದೆ.