ವಿಮಾನ ದುರಂತ ತಪ್ಪಿಸಿ ನೂರಾರು ಜೀವ ಉಳಿಸಿದ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್: ರಿಪ್ಪನ್‌ಪೇಟೆಯಲ್ಲಿ ದೀಪ ಬೆಳಗಿಸಿ ಗೌರವ ಸಮರ್ಪಣೆ.

ಅನಿಸಿಕೆ ನ್ಯೂಸ್ (ರಿಪ್ಪನ್‌ಪೇಟೆ):
ಆಕಾಶ ಮಧ್ಯೆ ಸಹ-ಪೈಲಟ್ ಚಾಕುವಿನಿಂದ ಮಾರಣಾಂತಿಕ ದಾಳಿ ನಡೆಸಿ ವಿಮಾನವನ್ನು ಅಪಘಾತಕ್ಕೀಡು ಮಾಡಲು ಯತ್ನಿಸಿದ ಭೀಕರ ಸನ್ನಿವೇಶದಲ್ಲೂ, ತಮ್ಮ ರಕ್ತಸಿಕ್ತ ದೇಹ ಹಾಗೂ ಪ್ರಾಣದ ಹಂಗು ತೊರೆದು ಹೋರಾಡಿ 174 ಪ್ರಯಾಣಿಕರ ಜೀವ ಉಳಿಸಿದ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ (Captain Smit Machchhar) ಅವರ ಜಾಗತಿಕ ಸಾಹಸಕ್ಕೆ ಮಲೆನಾಡಿನ ರಿಪ್ಪನ್‌ಪೇಟೆಯಲ್ಲಿ ಸಮಸ್ತ ದೇಶಾಭಿಮಾನಿಗಳು ದೀಪ ಬೆಳಗಿಸಿ, ಜಯಘೋಷ ಮೊಳಗಿಸುವ ಮೂಲಕ ಅಭೂತಪೂರ್ವ ಗೌರವ ಸಲ್ಲಿಸಿದರು.

ನಿನ್ನೆ ಸಂಜೆ ರಿಪ್ಪನ್‌ಪೇಟೆ  ಯಲ್ಲಿ ಜಮಾಯಿಸಿದ್ದ ನೂರಾರು ದೇಶಪ್ರೇಮಿಗಳು ಹಾಗೂ ನಾಗರಿಕರು, ಸಾವಿನ ದವಡೆಯಿಂದ ನೂರಾರು ಜೀವಗಳನ್ನು ಪಾರು ಮಾಡಿ ಇಡೀ ವಿಶ್ವವೇ ಭಾರತದತ್ತ ತಿರುಗಿ ನೋಡುವಂತೆ ಮಾಡಿದ ಧೀರ ಪೈಲಟ್‌ಗೆ ಶುಭ ಹಾರೈಸಿ, ಅವರ ಚೇತರಿಕೆಗೆ ಪ್ರಾರ್ಥಿಸಿದರು.

ಆಕಾಶದಲ್ಲಿ ನಡೆದಿದ್ದೇನು? ರೋಮಾಂಚನಕಾರಿ ಸಾಹಸಗಾಥೆ:

ಕಳೆದ ಸೆಪ್ಟೆಂಬರ್ 30. 2026ರಂದು ದುಬೈನಿಂದ ಇಸ್ರೇಲ್‌ನ ಟೆಲ್ ಅವಿವ್‌ಗೆ ಹೊರಟಿದ್ದ ಫ್ಲೈದುಬೈ ಎಫ್‌ಜೆಡ್‌ (FZ1073) ವಿಮಾನದಲ್ಲಿ ಈ ದುರ್ಘಟನೆ ನಡೆದಿತ್ತು. ವಿಮಾನ ಚಲಿಸುತ್ತಿದ್ದಾಗ ಕಾಕ್‌ಪಿಟ್‌ನಲ್ಲಿದ್ದ ಸಹ-ಪೈಲಟ್, ಮುಖ್ಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರ ಕುತ್ತಿಗೆ ಮತ್ತು ಕೈಗಳಿಗೆ ಚಾಕುವಿನಿಂದ ತೀವ್ರವಾಗಿ ಇರಿದು ವಿಮಾನವನ್ನು ನೆಲಕ್ಕಪ್ಪಳಿಸಲು ಸಂಚು ರೂಪಿಸಿದ್ದನು.

ತೀವ್ರ ರಕ್ತಸ್ರಾವವಾಗುತ್ತಿದ್ದರೂ ಧೃತಿಗೆಡದ ಕ್ಯಾಪ್ಟನ್ ಮಚ್ಚರ್, ಅಪ್ರತಿಮ ಧೈರ್ಯದಿಂದ ದಾಳಿಕೋರನನ್ನು ಹಿಮ್ಮೆಟ್ಟಿಸಿ, ಕಡೆಯ ಕ್ಷಣದಲ್ಲಿ ಕಾಕ್‌ಪಿಟ್ ಬಾಗಿಲು ತೆರೆದು ಇತರ ಸಿಬ್ಬಂದಿ ಒಳಬರಲು ನೆರವಾದರು. ಬಳಿಕ ವಿಮಾನವನ್ನು ಸೌದಿ ಅರೇಬಿಯಾದ ತಬೂಕ್ ನಗರದಲ್ಲಿ ಅತ್ಯಂತ ಸುರಕ್ಷಿತವಾಗಿ ಲ್ಯಾಂಡಿಂಗ್ ಮಾಡುವ ಮೂಲಕ ೧೭೪ ಪ್ರಯಾಣಿಕರ ಪಾಲಿಗೆ ದೇವರಾಗಿ ನಿಂತರು.

ವಿಶ್ವ ನಾಯಕರ ಪ್ರಶಂಸೆ ಹಾಗೂ ರಿಪ್ಪನ್‌ಪೇಟೆಯ ಗೌರವ:

ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಸ್ವತಃ ವಿಡಿಯೋ ಕಾಲ್ ಮೂಲಕ ಮಾತನಾಡಿ ಆರೋಗ್ಯ ವಿಚಾರಿಸಿದ್ದರೆ, ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಸೇರಿದಂತೆ ವಿಶ್ವದ ಪ್ರಮುಖ ನಾಯಕರು ಇವರ ಶೌರ್ಯವನ್ನು ಕೊಂಡಾಡಿದ್ದಾರೆ. ಸೌದಿ ಅರೇಬಿಯಾದ ಆಸ್ಪತ್ರೆಯಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿರುವ ಕ್ಯಾಪ್ಟನ್ ಮಚ್ಚರ್ ಸದ್ಯ ಚೇತರಿಸಿಕೊಳ್ಳುತ್ತಿದ್ದಾರೆ.

ಈ ಐತಿಹಾಸಿಕ ಸಾಹಸಕ್ಕೆ ಗೌರವ ಸಲ್ಲಿಸಲು ರಿಪ್ಪನ್‌ಪೇಟೆಯ ವಿನಾಯಕಪೇಟೆಯಲ್ಲಿ ಸಾರ್ವಜನಿಕರು ಹಾಗೂ ಯುವಕರು ನೂರಾರು ದೀಪಗಳನ್ನು ಬೆಳಗಿಸಿದರು. "ಭಾರತ್ ಮಾತಾ ಕೀ ಜೈ", "ವಂದೇ ಮಾತರಂ" ಘೋಷಣೆಗಳು ಮುಗಿಲುಮುಟ್ಟಿದವು.

"ತನ್ನ ರಕ್ತ ಹರಿದರೂ ಇತರರ ಜೀವ ಕಾಪಾಡಿದ ಇಂತಹ ಧೀರ ಭಾರತೀಯರು ದೇಶದ ನಿಜವಾದ ಆಸ್ತಿ" ಎಂದು ನೆರೆದಿದ್ದ ಮುಖಂಡರು ಹೆಮ್ಮೆಯಿಂದ ಸ್ಮರಿಸಿದರು.

ಈ ಅರ್ಥಪೂರ್ಣ ಹಾಗೂ ಭಾವನಾತ್ಮಕ ಕ್ಷಣದಲ್ಲಿ ರಿಪ್ಪನ್‌ಪೇಟೆಯ ಪ್ರಮುಖ ಸ್ಥಳೀಯ ಮುಖಂಡರು, ಊರಿನ ಹಿರಿಯರು, ನೂರಾರು ದೇಶಭಕ್ತ ನಾಗರಿಕರು ಹಾಗೂ ಯುವ ದೇಶಾಭಿಮಾನಿಗಳು ಅತ್ಯಂತ ಉತ್ಸಾಹದಿಂದ ಭಾಗವಹಿಸಿ, ಧೀರ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರ ಸಾಹಸಕ್ಕೆ ಒಕ್ಕೊರಲಿನಿಂದ ಗೌರವ ಸಲ್ಲಿಸಿ ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಿದರು.