ಪಡಿತರ ಚೀಟಿದಾರರ ಗಮನಕ್ಕೆ: ಅಕ್ಟೋಬರ್ 20ರೊಳಗೆ ಮೊಬೈಲ್‌ನಲ್ಲೇ ಇ-ಕೆವೈಸಿ ಪೂರ್ಣಗೊಳಿಸಿ! ಯಾವುದೇ ನಕಲಿ ಲಿಂಕ್ ಕ್ಲಿಕ್ ಮಾಡಬೇಡಿ; ಪ್ಲೇ ಸ್ಟೋರ್‌ನಲ್ಲಿ ಈ ಆ್ಯಪ್‌ಗಳನ್ನೇ ಡೌನ್‌ಲೋಡ್ ಮಾಡಿ!

 
ರಾಜ್ಯ ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯ ಆದೇಶದಂತೆ ಎಲ್ಲಾ ಪಡಿತರ ಚೀಟಿದಾರರು (Ration Card Holders) ತಮ್ಮ ಕುಟುಂಬದ ಸದಸ್ಯರ ಇ-ಕೆವೈಸಿ (e-KYC) ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ಅಕ್ಟೋಬರ್ 20 ಕೊನೆಯ ದಿನಾಂಕವಾಗಿದೆ. ಪಡಿತರ ವಿತರಣೆಯಲ್ಲಿ ಯಾವುದೇ ಅಡಚಣೆಯಾಗದಂತೆ ಮುನ್ನೆಚ್ಚರಿಕೆ ವಹಿಸಲು ಬಾಕಿ ಇರುವ ಸದಸ್ಯರ ಇ-ಕೆವೈಸಿ ಮಾಡಿಸುವುದು ಕಡ್ಡಾಯವಾಗಿದೆ.

ಪಡಿತರ ಚೀಟಿದಾರರು ಯಾವುದೇ ಸೈಬರ್ ಸೆಂಟರ್ ಅಥವಾ ಕಚೇರಿಗಳಿಗೆ ಅಲೆಯುವ ಅಗತ್ಯವಿಲ್ಲದೆ, ತಮ್ಮದೇ ಆಂಡ್ರಾಯ್ಡ್ ಮೊಬೈಲ್ ಮೂಲಕ ಮನೆಯಲ್ಲೇ ಕುಳಿತು 'ಅನ್ನಸೇವಾ' ಆ್ಯಪ್ ಬಳಸಿ ಸುಲಭವಾಗಿ ಇ-ಕೆವೈಸಿ ಮಾಡಿಕೊಳ್ಳಲು ಸರ್ಕಾರ ಅವಕಾಶ ಕಲ್ಪಿಸಿದೆ.

ಎಚ್ಚರಿಕೆ: ವಾಟ್ಸಾಪ್ ಲಿಂಕ್‌ಗಳನ್ನು ಕ್ಲಿಕ್ ಮಾಡಬೇಡಿ, ಪ್ಲೇ ಸ್ಟೋರ್‌ನಲ್ಲೇ ಡೌನ್‌ಲೋಡ್ ಮಾಡಿ!

ಇತ್ತೀಚಿನ ದಿನಗಳಲ್ಲಿ ಇ-ಕೆವೈಸಿ ನೆಪದಲ್ಲಿ ಸೈಬರ್ ವಂಚನೆಗಳು ಹೆಚ್ಚುತ್ತಿದ್ದು, ವಾಟ್ಸಾಪ್ ಅಥವಾ ಎಸ್‌ಎಂಎಸ್ ಮೂಲಕ ಬರುವ ಯಾವುದೇ ಅಪರಿಚಿತ ಲಿಂಕ್‌ಗಳನ್ನು ಕ್ಲಿಕ್ ಮಾಡಬಾರದು. ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ (Google Play Store) ಅಧಿಕೃತ ಸರ್ಕಾರಿ ಆ್ಯಪ್‌ಗಳನ್ನು ಮಾತ್ರ ಸರ್ಚ್ ಮಾಡಿ ಇನ್‌ಸ್ಟಾಲ್ ಮಾಡಿಕೊಳ್ಳಬೇಕು.

ಇ-ಕೆವೈಸಿ ಪೂರ್ಣಗೊಳಿಸಲು ಈ ಮೂರು ಆ್ಯಪ್‌ಗಳು ಮೊಬೈಲ್‌ನಲ್ಲಿ ಇರಬೇಕು:
ಅನ್ನಸೇವಾ (Annaseva App): ಕರ್ನಾಟಕ ಸರ್ಕಾರದ ಆಹಾರ ಇಲಾಖೆಯ ಅಧಿಕೃತ ಆ್ಯಪ್. (ಹಳೆಯ ಆ್ಯಪ್ ಇದ್ದರೆ ಅನ್‌ಇನ್‌ಸ್ಟಾಲ್ ಮಾಡಿ, ಪ್ಲೇ ಸ್ಟೋರ್‌ನಿಂದ ಹೊಸ ಆವೃತ್ತಿಯನ್ನು ಡೌನ್‌ಲೋಡ್ ಮಾಡಿ).

AadhaarFaceRD (UIDAI): ಮುಖದ ಚಹರೆ ಗುರುತಿಸಲು ಕೇಂದ್ರ ಸರ್ಕಾರದ ಯುಐಡಿಎಐನ ಅಧಿಕೃತ ಆ್ಯಪ್.

CeG Face KYC App: ಕರ್ನಾಟಕ ಸರ್ಕಾರದ ಇ-ಆಡಳಿತ ಇಲಾಖೆಯ ಬೆಂಬಲಿತ ಆ್ಯಪ್.



ಮೊಬೈಲ್‌ನಲ್ಲಿ ಇ-ಕೆವೈಸಿ ಮಾಡುವ ಸರಳ ಹಂತಗಳು:

ಆ್ಯಪ್ ಓಪನ್ ಮಾಡಿ: ಹೊಸ 'ಅನ್ನಸೇವಾ' ಆ್ಯಪ್ ತೆರೆದು "ಸ್ವಯಂ / ನಾಗರಿಕ" ಆಯ್ಕೆ ಮಾಡಿ.

ವಿವರ ನಮೂದಿಸಿ: ನಿಮ್ಮ ಜಿಲ್ಲೆ, ರೇಷನ್ ಕಾರ್ಡ್ ಸಂಖ್ಯೆ ಮತ್ತು ಕುಟುಂಬದ ಮುಖ್ಯಸ್ಥರ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆ ಹಾಕಿ 'ಒ.ಟಿ.ಪಿ ಕಳುಹಿಸಿ' ಕ್ಲಿಕ್ ಮಾಡಿ.

ಸ್ಥಿತಿ ಪರಿಶೀಲನೆ: ಮೊಬೈಲ್‌ಗೆ ಬರುವ OTP ನಮೂದಿಸಿದಾಗ, ನಿಮ್ಮ ಪಡಿತರ ಚೀಟಿಯಲ್ಲಿರುವ ಎಲ್ಲಾ ಸದಸ್ಯರ ಹೆಸರು ಹಾಗೂ ಅವರ ಇ-ಕೆವೈಸಿ ಸ್ಥಿತಿ ಕಾಣಿಸುತ್ತದೆ (ಯಾರದ್ದು ಪೂರ್ಣಗೊಂಡಿದೆ, ಯಾರದ್ದು ಬಾಕಿ ಇದೆ ಎಂಬುದು ತಿಳಿಯುತ್ತದೆ).

ಫೇಸ್ ಕ್ಯಾಪ್ಚರ್ (Face Capture): ಇ-ಕೆವೈಸಿ ಬಾಕಿ ಇರುವ ಸದಸ್ಯರ ಹೆಸರನ್ನು ಆಯ್ಕೆ ಮಾಡಿ, ಅವರ ಆಧಾರ್ ಲಿಂಕ್ಡ್ ಮೊಬೈಲ್ ಸಂಖ್ಯೆ ಬಳಸಿ, ಮೊಬೈಲ್ ಕ್ಯಾಮೆರಾ ಮೂಲಕ ಮುಖದ ಫೋಟೋ ಸ್ಕ್ಯಾನ್ ಮಾಡಿ ಪ್ರಕ್ರಿಯೆ ಮುಗಿಸಿ.

ದೃಢೀಕರಣ: ಇ-ಕೆವೈಸಿ ಯಶಸ್ವಿಯಾದ ನಂತರ ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಅಧಿಕೃತ ದೃಢೀಕರಣ ಸಂದೇಶ (SMS) ಬರುತ್ತದೆ.

ಸರ್ವರ್ ಸ್ಲೋ ಇದ್ದರೆ ಆತಂಕ ಬೇಡ, ಪುನಃ ಪ್ರಯತ್ನಿಸಿ!

ರಾಜ್ಯಾದ್ಯಂತ ಲಕ್ಷಾಂತರ ಜನರು ಏಕಕಾಲದಲ್ಲಿ ಆ್ಯಪ್ ಬಳಸುತ್ತಿರುವುದರಿಂದ, ಲಾಗಿನ್ ಆಗುವಾಗ "ಸರ್ವರ್ ಸ್ಲೋ" ಅಥವಾ "ಮತ್ತೆ ಪ್ರಯತ್ನಿಸಿ" (Loading / Try Again) ಎಂದು ಲೋಡಿಂಗ್ ಚಿಹ್ನೆ ಕಾಣಿಸಿಕೊಳ್ಳಬಹುದು. ಇದಕ್ಕೆ ಗಾಬರಿಯಾಗುವ ಅಗತ್ಯವಿಲ್ಲ. ನೆಟ್‌ವರ್ಕ್ ಉತ್ತಮವಾಗಿರುವ ಸ್ಥಳದಲ್ಲಿ ಎರಡು-ಮೂರು ಬಾರಿ ಪುನಃ ಪ್ರಯತ್ನಿಸಿದರೆ ಸುಲಭವಾಗಿ ಲಾಗಿನ್ ಆಗುತ್ತದೆ.

ಪಡಿತರ ಸೌಲಭ್ಯ ರದ್ದಾಗದಂತೆ ಮುನ್ನೆಚ್ಚರಿಕೆ ವಹಿಸಲು ಅಕ್ಟೋಬರ್ ೨೦ರ ಒಳಗಾಗಿ ಬಾಕಿ ಇರುವ ಪ್ರತಿಯೊಬ್ಬ ಸದಸ್ಯರ ಇ-ಕೆವೈಸಿ ಮಾಡಿಸಿಕೊಳ್ಳಲು ಆಹಾರ ಇಲಾಖೆ ಕೋರಿದೆ.

📲 ಅಧಿಕೃತ ಆ್ಯಪ್ ಲಿಂಕ್: https://play.google.com/store/apps/details?id=in.gov.karnataka.ahara.annaseva&pcampaignid=web_share

⚠️ ಗಮನಿಸಿ: ಅನ್ನಸೇವಾ ಆ್ಯಪ್ ಡೌನ್‌ಲೋಡ್ ಮಾಡಿದ ನಂತರ ಅದರಲ್ಲೇ ಕೇಳುವ ಇನ್ನೆರಡು ಸಹಾಯಕ ಆ್ಯಪ್‌ಗಳನ್ನು ಪ್ಲೇ ಸ್ಟೋರ್‌ನಿಂದಲೇ ಇನ್‌ಸ್ಟಾಲ್ ಮಾಡಿಕೊಳ್ಳಿ. ಸರ್ವರ್ ಸ್ಲೋ ಬಂದರೆ ೨-೩ ಬಾರಿ ಪುನಃ ಪ್ರಯತ್ನಿಸಿ, ಖಂಡಿತ ಆಗುತ್ತದೆ.