ನಮಗೂ ನಮ್ಮೂರಿಗೂ ಒಂದು ಚಿತ್ರಮಂದಿರ ಬೇಕು! 17 ವರ್ಷಗಳಿಂದ ಬೆಳ್ಳಿಪರದೆಯ ಸಂಭ್ರಮದಿಂದ ವಂಚಿತವಾದ ಹೊಸನಗರ-ರಿಪ್ಪನ್‌ಪೇಟೆ: ಚಿತ್ರರಂಗ ಹಾಗೂ ಭಾರತ್ ಸಿನಿಮಾಸ್ ಇತ್ತ ಗಮನಹರಿಸುವುದೇ?

ರಿಪ್ಪನ್‌ಪೇಟೆ / ಹೊಸನಗರ (ಅನಿಸಿಕೆ ನ್ಯೂಸ್)
ಶಿವಮೊಗ್ಗ ಜಿಲ್ಲೆಯ ವಿಸ್ತೀರ್ಣದಲ್ಲಿ ಅತ್ಯಂತ ದೊಡ್ಡ ತಾಲೂಕುಗಳಲ್ಲಿ ಒಂದಾದ ಹೊಸನಗರ ತಾಲೂಕಿನ ಜನತೆ ಕಳೆದ ಸುಮಾರು 17 ವರ್ಷಗಳಿಂದ ಒಂದು ಮೂಲಭೂತ ಮನರಂಜನೆಯಿಂದ ಸಂಪೂರ್ಣವಾಗಿ ವಂಚಿತರಾಗಿದ್ದಾರೆ. ಹೌದು, ಸುತ್ತಮುತ್ತಲಿನ ಹತ್ತಾರು ಹಳ್ಳಿಗಳ ಜೀವನಾಡಿಯಾಗಿರುವ ಹೊಸನಗರ ಹಾಗೂ ರಿಪ್ಪನ್‌ಪೇಟೆ ಭಾಗದಲ್ಲಿ ಇಂದಿಗೂ ಒಂದೇ ಒಂದು ಸುಸಜ್ಜಿತ ಚಲನಚಿತ್ರ ಮಂದಿರವಿಲ್ಲದಿರುವುದು ಈ ಭಾಗದ ಸಿನಿಪ್ರಿಯರ ನಿರಂತರ ಬೇಸರಕ್ಕೆ ಕಾರಣವಾಗಿದೆ.

ನಾಲ್ಕು ತಾಲೂಕುಗಳ ಹೆಬ್ಬಾಗಿಲು, ಮಿನಿ ಸಿಟಿಯಂತಿರುವ ರಿಪ್ಪನ್‌ಪೇಟೆ!

ಶಿವಮೊಗ್ಗ, ಸಾಗರ, ತೀರ್ಥಹಳ್ಳಿ ಹಾಗೂ ಹೊಸನಗರ—ಈ ನಾಲ್ಕೂ ಪ್ರಮುಖ ನಗರಗಳಿಗೆ ಕೇಂದ್ರ ಬಿಂದುವಾಗಿ (Center Place) ನಿಂತಿರುವುದು ರಿಪ್ಪನ್‌ಪೇಟೆ. ಆಡಳಿತಾತ್ಮಕವಾಗಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿದ್ದರೂ, ಬೆಳವಣಿಗೆಯ ದೃಷ್ಟಿಯಿಂದ ತಾಲೂಕು ಕೇಂದ್ರವನ್ನೂ ಮೀರಿಸುವಂತೆ ವಾಣಿಜ್ಯಿಕವಾಗಿ ಬೆಳೆದು ನಿಂತಿದೆ:

'ಮೋರ್' (More Supermarket) ನಂತಹ ದೊಡ್ಡ ಶಾಪಿಂಗ್ ಮಾಲ್‌ಗಳು ಸೇರಿದಂತೆ ಎರಡು ಬೃಹತ್ ವಾಣಿಜ್ಯ ಸಂಕೀರ್ಣಗಳು ಇಲ್ಲಿವೆ.

ಪಟ್ಟಣವನ್ನು ಸಂಪರ್ಕಿಸುವ ನಾಲ್ಕೂ ಪ್ರಮುಖ ರಸ್ತೆಗಳಲ್ಲಿ ಸುಸಜ್ಜಿತ ನಾಲ್ಕು ಪೆಟ್ರೋಲ್ ಬಂಕ್‌ಗಳಿವೆ.

ಪ್ರತಿನಿತ್ಯ ಸಾವಿರಾರು ವಾಹನಗಳು, ಪ್ರಯಾಣಿಕರಿಂದ ತುಂಬಿ ತುಳುಕುವ ರಿಪ್ಪನ್‌ಪೇಟೆ ಸರ್ಕಲ್ ಒಂದು ಸಿಟಿ ಸೆಂಟರ್‌ನಂತೆ ಸದಾ ಕಂಗೊಳಿಸುತ್ತಿರುತ್ತದೆ.

ಆದರೆ, ಇಷ್ಟೆಲ್ಲಾ ಸೌಲಭ್ಯ, ಜನಸಂಖ್ಯೆ ಮತ್ತು ನಿತ್ಯ ಚಟುವಟಿಕೆಗಳಿದ್ದರೂ, ಇಡೀ ಪಟ್ಟಣದಲ್ಲಿ ಕುಟುಂಬ ಸಮೇತ ಕುಳಿತು ಸಿನಿಮಾ ನೋಡಲು ಒಂದು ಸಣ್ಣ ಸ್ಕ್ರೀನ್ ಚಿತ್ರಮಂದಿರವಿಲ್ಲದಿರುವುದು ವಿಪರ್ಯಾಸ.

ನೆನಪಿನ ಗರ್ಭ ಸೇರಿದ ಹಳೇ ಟಾಕೀಸ್‌ಗಳು: ಗೇರುಬೀಜ ಫ್ಯಾಕ್ಟರಿಯಾದ 'ಸ್ವಸ್ತಿಕ್'!

ಒಂದು ಕಾಲದಲ್ಲಿ ಹೊಸನಗರ ಮತ್ತು ಸುತ್ತಮುತ್ತಲಿನ ಮಲೆನಾಡು ಭಾಗದಲ್ಲಿ ಸಿನಿಮಾ ಸಂಸ್ಕೃತಿ ಜೀವಂತವಾಗಿತ್ತು. ಕಾಲಕ್ರಮೇಣ ನಿರ್ವಹಣೆ ಮತ್ತು ಬದಲಾದ ಕಾಲಘಟ್ಟಕ್ಕೆ ತಕ್ಕಂತೆ ಆಧುನೀಕರಣಗೊಳ್ಳದೆ ಒಂದೊಂದಾಗಿ ಚಿತ್ರಮಂದಿರಗಳು ಬಾಗಿಲು ಮುಚ್ಚಿದವು:

ಸ್ವಸ್ತಿಕ್ ಚಿತ್ರಮಂದಿರ (ರಿಪ್ಪನ್‌ಪೇಟೆ): ಊರಿನ ಸಂಭ್ರಮದ ತಾಣವಾಗಿದ್ದ ಈ ಟಾಕೀಸ್ ಮುಚ್ಚಿಹೋಗಿದ್ದು, ಪ್ರಸ್ತುತ ಆ ಕಟ್ಟಡವು ರಬ್ಬರ್ ಖರೀದಿ ಕೇಂದ್ರ , ಹಾಗೂ ಗೇರುಬೀಜದ ಫ್ಯಾಕ್ಟರಿಯಾಗಿ ಮಾರ್ಪಟ್ಟಿದೆ.

ಶ್ರೀನಿವಾಸ (ಹೊಸನಗರ), ಶರಾವತಿ (ಕೊಣಂದೂರು), ಬಸವೇಶ್ವರ (ಆಯನೂರು), ರಾಘವೇಂದ್ರ (ಆನಂದಪುರಂ), ಸಾಗರ್ ಹಾಗೂ ಶ್ರೀಕೃಷ್ಣ ಟಾಕೀಸ್ (ಸಾಗರ), ವಿನಾಯಕ, ಮಹಾದೇವಿ ಹಾಗೂ ಮಂಜುನಾಥ (ಶಿವಮೊಗ್ಗ).

ಹೀಗೆ ಗ್ರಾಮೀಣ ಹಾಗೂ ಪಟ್ಟಣ ಭಾಗದ ಸಾಲು ಸಾಲು ಹಳೆಯ ಚಿತ್ರಮಂದಿರಗಳು ಇತಿಹಾಸದ ಪುಟ ಸೇರಿವೆ. ಹೊಸ ಸಿನಿಮಾ ನೋಡಬೇಕೆಂದರೆ ಹೊಸನಗರ, ನಗರ, ರಿಪ್ಪನ್‌ಪೇಟೆಯ ಜನರು ಕನಿಷ್ಠ 40 ರಿಂದ 50 ಕಿಲೋಮೀಟರ್ ದೂರದ ಶಿವಮೊಗ್ಗ ಅಥವಾ ಸಾಗರಕ್ಕೆ ಪ್ರಯಾಣಿಸಬೇಕಾದ ಅನಿವಾರ್ಯತೆ ಇದೆ.

ಚಿತ್ರರಂಗ ಮತ್ತು ಮಲ್ಟಿಪ್ಲೆಕ್ಸ್ ಸಂಸ್ಥೆಗಳಿಗೆ ಸ್ಥಳೀಯರ ಮುಕ್ತ ಆಹ್ವಾನ:

ಕನ್ನಡ ಚಿತ್ರರಂಗದಲ್ಲಿ ಇಂದು ಕೋಟಿ ಕೋಟಿ ರೂಪಾಯಿ ಬಂಡವಾಳ ಹೂಡಿ ಸಿನಿಮಾಗಳನ್ನು ನಿರ್ಮಿಸಲಾಗುತ್ತಿದೆ. ಆದರೆ, ಇಂತಹ ಸಿನಿಮಾಗಳನ್ನು ಪ್ರದರ್ಶಿಸಲು ಗ್ರಾಮೀಣ ಭಾಗದಲ್ಲಿ ಪರದೆಗಳೇ ಇಲ್ಲದಿದ್ದರೆ ಆ ಚಿತ್ರಗಳು ಜನಸಾಮಾನ್ಯರನ್ನು ತಲುಪುವುದು ಹೇಗೆ?

ಅದ್ಯಾವುದೋ ಸಿನಿಮಾಗಳಿಗೆ ಅನಗತ್ಯ ಕೋಟ್ಯಂತರ ರೂಪಾಯಿ ಖರ್ಚು ಮಾಡುವ ಬದಲು, ನಾಲ್ಕು ತಾಲೂಕುಗಳ ಜಂಕ್ಷನ್ ಆಗಿರುವ ರಿಪ್ಪನ್‌ಪೇಟೆಯಂತಹ ಪ್ರಮುಖ ಸ್ಥಳದಲ್ಲಿ 100 ರಿಂದ 150 ಆಸನಗಳ ಮಿನಿ ಸ್ಕ್ರೀನ್ (Mini Theater / Multiplex) ನಿರ್ಮಿಸಿದರೆ, ಇಡೀ ತಾಲೂಕಿನ ಜನತೆ ಚಿತ್ರಮಂದಿರಕ್ಕೆ ಬಂದು ಕೈಹಿಡಿಯುವುದರಲ್ಲಿ ಯಾವುದೇ ಸಂಶಯವಿಲ್ಲ.

ರಾಜ್ಯದಲ್ಲಿ ಮಿನಿ ಮಲ್ಟಿಪ್ಲೆಕ್ಸ್ ಕ್ರಾಂತಿ ಮಾಡುತ್ತಿರುವ 'ಭಾರತ್ ಸಿನಿಮಾಸ್' (Bharat Cinemas) ಅಥವಾ ಸ್ಥಳೀಯ ಉದ್ಯಮಿಗಳು, ಚಿತ್ರರಂಗದ ಹೂಡಿಕೆದಾರರು ಇತ್ತ ಗಮನಹರಿಸಿ ರಿಪ್ಪನ್‌ಪೇಟೆಯಲ್ಲಿ ಒಂದು ಸುಂದರ ಮಿನಿ ಸ್ಕ್ರೀನ್ ಆರಂಭಿಸಲಿ ಎಂಬುದು ಮಲೆನಾಡಿನ ಸಮಸ್ತ ಸಾರ್ವಜನಿಕರ ಹಾಗೂ ಸಿನಿಮಾ ಪ್ರೇಮಿಗಳ ಪ್ರಬಲ ಒತ್ತಾಯವಾಗಿದೆ.