ಸಾಗರದ ಹೊನ್ನೇಸರದಲ್ಲಿ ‘ಗಾಂಧಿ ಸಂತೆ ಅದ್ಧೂರಿ ಚಾಲನೆ: ದೇಸಿ ಕೈಮಗ್ಗ, ಕರಕುಶಲ ವಸ್ತುಗಳ ಮೇಳ; ಸಂಸದ ಬಿ.ವೈ. ರಾಘವೇಂದ್ರ, ಶಾಸಕ ಬೇಳೂರು ಗೋಪಾಲಕೃಷ್ಣ ಭಾಗಿ!

ಅನಿಸಿಕೆ ನ್ಯೂಸ್ (ಸಾಗರ/ಹೊನ್ನೇಸರ):

ಸ್ವದೇಶಿ ಚಿಂತನೆ, ಸ್ವಾವಲಂಬನೆ ಹಾಗೂ ಗ್ರಾಮೀಣ ಆರ್ಥಿಕತೆಯ ಸಬಲೀಕರಣದ ಧ್ಯೇಯದೊಂದಿಗೆ ಮಲೆನಾಡಿನ ಮಡಿಲಲ್ಲಿ ಅಪರೂಪದ ದೇಸಿ ಉತ್ಸವಕ್ಕೆ ಚಾಲನೆ ದೊರೆತಿದೆ. ಸಾಗರ ತಾಲೂಕಿನ ಹೊನ್ನೇಸರದಲ್ಲಿರುವ ಖ್ಯಾತ ರಂಗಕರ್ಮಿ ಹಾಗೂ ಗಾಂಧಿವಾದಿ ಪ್ರಸನ್ನ ಹೆಗ್ಗೋಡು ಅವರ ಮಾರ್ಗದರ್ಶನದಲ್ಲಿ ಕಾರ್ಯನಿರ್ವಹಿಸುತ್ತಿರುವ 'ಚರಕ ಶ್ರಮಜೀವಿಗಳ ಆಶ್ರಮ'ದಲ್ಲಿ  ಸೆ.26 ಮತ್ತು 27ರಂದು’  ಎರಡು ದಿನಗಳ ಕಾಲ ಆಯೋಜಿಸಲಾಗಿರುವ ವಿನೂತನ ‘ಗಾಂಧಿ ಸಂತೆ - 2026’ ಹಾಗೂ ಕೊಡು-ಕೊಳ್ಳುವವರ ಸಮಾವೇಶಕ್ಕೆ ಶನಿವಾರ ಅಧಿಕೃತ ಚಾಲನೆ ನೀಡಲಾಯಿತು.

ರಾಜ್ಯ ಸರ್ಕಾರದ ಪ್ರವಾಸೋದ್ಯಮ ಇಲಾಖೆಯ ಸಹಯೋಗದೊಂದಿಗೆ ಕವಿ-ಕಾವ್ಯ ಟ್ರಸ್ಟ್, ದೇಸಿ ಟ್ರಸ್ಟ್ ಹಾಗೂ ಜೀವನ್ಮುಖಿ ಸಾಗರ ಸಂಸ್ಥೆಗಳ ಸಂಯುಕ್ತ ಆಶ್ರಯದಲ್ಲಿ ಈ ಸಂತೆ ಆಯೋಜನೆಗೊಂಡಿದ್ದು, ಗ್ರಾಮೀಣ ದೇಸಿ ಉತ್ಪಾದಕರು ಮತ್ತು ನಗರ ಪ್ರದೇಶದ ಖರೀದಿದಾರರ ನಡುವೆ ನೇರ ಕೊಂಡಿ ಕಲ್ಪಿಸುವುದು ಇದರ ಮೂಲ ಉದ್ದೇಶವಾಗಿದೆ.

                     ಫೋಟೋ ಕೃಪೆ: ಮಾಧ್ಯಮ ಮೂಲ / ಸಂಘಟಕರು

ಗಾಂಧಿ ಸಂತೆಗೆ ಚಾಲನೆ ಹಾಗೂ ಅಭಿವೃದ್ಧಿ ಕಾಮಗಾರಿಗಳ ಲೋಕಾರ್ಪಣೆ:

ಸಮಾರಂಭದಲ್ಲಿ ಭಾಗವಹಿಸಿದ ಸಂಸದ ಬಿ.ವೈ. ರಾಘವೇಂದ್ರ ಅವರು ‘ಗಾಂಧಿ ಸಂತೆ’ಯನ್ನು ಉದ್ಘಾಟಿಸಿದರು. ನಂತರ ಕೊಡು-ಕೊಳ್ಳುವವರ ಮೇಳಕ್ಕೆ ಚಾಲನೆ ನೀಡಿದ ಸಾಗರ ಶಾಸಕ ಬೇಳೂರು ಗೋಪಾಲಕೃಷ್ಣ ಅವರು ‘ಕಾಗೋಡು ತಿಮ್ಮಪ್ಪ ಮಾರ್ಗ’ವನ್ನು ಸಾರ್ವಜನಿಕರ ಬಳಕೆಗೆ ಲೋಕಾರ್ಪಣೆಗೊಳಿಸಿದರು. ಇದೇ ಸಂದರ್ಭದಲ್ಲಿ ವಿರೂಪಾಕ್ಷನ ಜಡ್ಡು ಕೆರೆ ಆವರಣದಲ್ಲಿ ನಿರ್ಮಾಣವಾಗಲಿರುವ 'ಗಂಗಾ ತಟ' ಕಾಮಗಾರಿಗೆ ಗಣ್ಯರು ಶಂಕುಸ್ಥಾಪನೆ ನೆರವೇರಿಸಿದರು.

ಗ್ರಾಮೀಣ ಜೀವನ ಪದ್ಧತಿ, ಸ್ವಾವಲಂಬನೆಯೇ ಬಲ — ಸಂಸದ ಬಿ.ವೈ. ರಾಘವೇಂದ್ರ:

ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಸಂಸದ ಬಿ.ವೈ. ರಾಘವೇಂದ್ರ ಅವರು, "ಆಧುನಿಕತೆ ಹಾಗೂ ನಗರೀಕರಣದ ಪ್ರಭಾವದಿಂದ ಜನರು ಹಳ್ಳಿಗಳಿಂದ ನಗರಗಳತ್ತ ವಲಸೆ ಹೋಗುತ್ತಿರುವ ಪ್ರಸ್ತುತ ದಿನಗಳಲ್ಲಿ, ನಮ್ಮ ಮಣ್ಣಿನ ಗುಣ, ಗ್ರಾಮೀಣ ಜೀವನ ಪದ್ಧತಿ ಮತ್ತು ಸ್ಥಳೀಯ ಉತ್ಪಾದನೆಗಳ ಮಹತ್ವವನ್ನು ಎಂದಿಗೂ ಮರೆಯಬಾರದು. ಸ್ವದೇಶಿ ಎಂಬುದು ಕೇವಲ ವಸ್ತುಗಳನ್ನು ಕೊಳ್ಳುವ ವಿಚಾರವಲ್ಲ, ಅದು ನಮ್ಮ ಸ್ಥಳೀಯ ಆರ್ಥಿಕತೆ, ಉದ್ಯೋಗ ಸೃಷ್ಟಿ, ಸ್ವಾಭಿಮಾನ ಹಾಗೂ ಸ್ವಾವಲಂಬನೆಯ ಪ್ರತೀಕವಾಗಿದೆ. ಸ್ಥಳೀಯ ಕೈಮಗ್ಗ ಹಾಗೂ ನೈಸರ್ಗಿಕ ಉತ್ಪನ್ನಗಳಿಗೆ ದೇಶ-ವಿದೇಶಗಳಲ್ಲಿ ಬೇಡಿಕೆ ಹೆಚ್ಚುತ್ತಿದ್ದು, ಮೌಲ್ಯವರ್ಧನೆ ಮತ್ತು ಮಾರುಕಟ್ಟೆ ಜಾಲ ವಿಸ್ತರಿಸುವ ಮೂಲಕ ಆತ್ಮನಿರ್ಭರ ಭಾರತದ ಆಶಯವನ್ನು ಗಟ್ಟಿಗೊಳಿಸಬೇಕಿದೆ" ಎಂದು ಕರೆ ನೀಡಿದರು.

             ಫೋಟೋ ಕೃಪೆ: ಮಾಧ್ಯಮ ಮೂಲ / ಸಂಘಟಕರು

ಸಂತೆಯಲ್ಲಿ ಗಮನ ಸೆಳೆದ ದೇಸಿ ಉತ್ಪನ್ನಗಳ ವೈವಿಧ್ಯ:

ಸಂತೆಯ ಮೊದಲ ದಿನವೇ ಬೆಂಗಳೂರು, ಮಂಗಳೂರು, ಚೆನ್ನೈ, ಗರಗ ಹಾಗೂ ಹಾವೇರಿ ಸೇರಿದಂತೆ ರಾಜ್ಯ-ಹೊರರಾಜ್ಯಗಳಿಂದ ನೂರಾರು ಉತ್ಪಾದಕರು ಮತ್ತು ಖರೀದಿದಾರರು ಉತ್ಸಾಹದಿಂದ ಪಾಲ್ಗೊಂಡಿದ್ದರು:

ಫೋಟೋ ಕೃಪೆ: ಮಾಧ್ಯಮ ಮೂಲ / ಸಂಘಟಕರು

ಉತ್ತರ ಕರ್ನಾಟಕದ ತಿನಿಸುಗಳು: ಧಾರವಾಡದ ‘ಜಾಗೃತಿ’ ಸಂಸ್ಥೆಯ ಸಾಂಪ್ರದಾಯಿಕ ಆಹಾರಗಳು, ವಿಜಯಪುರದ ‘ಭುವನೇಶ್ವರಿ ಒಕ್ಕೂಟ’ದ ಶೇಂಗಾ ಹೋಳಿಗೆ, ಶೇಂಗಾ, ಚಟ್ನಿಪುಡಿ ಹಾಗೂ ನೈಸರ್ಗಿಕ ಉತ್ಪನ್ನಗಳು ಗ್ರಾಹಕರ ಬಾಯಲ್ಲಿ ನೀರೂರಿಸಿದವು.



ಕೈಮಗ್ಗ ಹಾಗೂ ಕರಕುಶಲ ವಸ್ತುಗಳು: ಚರಕ ಸಂಸ್ಥೆಯ ಪರಿಶುದ್ಧ ನೈಸರ್ಗಿಕ ಬಣ್ಣಗಳ ಕೈಮಗ್ಗ ವಸ್ತ್ರಗಳು, ಜಿಯೋಸ್ಮಿನ್ ಸಂಸ್ಥೆಯ ನವೀನ ಬಿದಿರು ಉತ್ಪನ್ನಗಳು, ಟೆರಾಕೋಟಾ ಆಭರಣಗಳು, ಗಾಣದ ಶುದ್ಧ ಎಣ್ಣೆ, ನಾಟಿ ಉಪ್ಪಿನಕಾಯಿ ಹಾಗೂ ಮಣ್ಣಿನ ಮಡಕೆಗಳು ಪ್ರದರ್ಶನದಲ್ಲಿ ಜನರ ಮನಗೆದ್ದವು.

          ಫೋಟೋ ಕೃಪೆ: ಮಾಧ್ಯಮ ಮೂಲ / ಸಂಘಟಕರು

ಸಾಂಸ್ಕೃತಿಕ ಕಳೆ ಕಟ್ಟಿದ ಶ್ರಮಜೀವಿಗಳ ಫ್ಯಾಷನ್ ಶೋ:

ಚರಕ ಸಂಘದ ಅಧ್ಯಕ್ಷೆ ಮಹಾಲಕ್ಷ್ಮಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಭಾ ಕಾರ್ಯಕ್ರಮದಲ್ಲಿ ಚರಕದ ಪ್ರಮುಖರಾದ ಎನ್. ರಮೇಶ್, ಪದ್ಮಶ್ರೀ, ನಾಗರತ್ನ, ಕೃಷ್ಣ, ರುದ್ರಪ್ಪ, ಸಿಇಒ ಟೆರೆನ್ಸ್ ಪೀಟರ್, ದೇಸಿ ಟ್ರಸ್ಟ್‌ನ ವ್ಯವಸ್ಥಾಪಕ ಟ್ರಸ್ಟಿ ಶಾರದಾ ಹಾಗೂ ತಾಂತ್ರಿಕ ಸಲಹೆಗಾರ ರಾಮಚಂದ್ರಪ್ಪ ಮುಂತಾದವರು ಉಪಸ್ಥಿತರಿದ್ದರು.

ಉದ್ಘಾಟನಾ ಸಮಾರಂಭದ ಬಳಿಕ ವಿದುಷಿ ವಸುಧಾ ಶರ್ಮಾ ಮತ್ತು ತಂಡದವರಿಂದ ಸುಶ್ರಾವ್ಯ ಲಘು ಸಂಗೀತ ಗಾಯನ ನಡೆಯಿತು. ಇದರೊಂದಿಗೆ ಕೈಮಗ್ಗ ನೇಕಾರರು ಮತ್ತು ಶ್ರಮಜೀವಿಗಳೇ ವೇದಿಕೆಯಲ್ಲಿ ಹೆಜ್ಜೆ ಹಾಕಿದ ವಿನೂತನ ‘ಶ್ರಮಜೀವಿಗಳ ಫ್ಯಾಷನ್ ಶೋ’ ನೆರೆದಿದ್ದ ಸಾರ್ವಜನಿಕರ ವಿಶೇಷ ಮೆಚ್ಚುಗೆಗೆ ಪಾತ್ರವಾಯಿತು.